गेम्समध्ये होते 'बेटिंग' :
मोबाईल हा खर्‍या अर्थाने गरज असला
तरी त्याचा सदुपयोग होण्याबरोबरच दुरुपयोग होण्याचे प्रस्थ वाढले आहे. अँन्डरॉईड मोबाईलमध्ये इंटरनेटद्वारे डाऊनलोड केल्या जाणार्‍या अश्लील चित्रफितीपासून आता ऑनलाईन जुगार म्हणजे तीन पत्तीचा डाव रंगत असल्याचे दिसून येते. हीच बाब संवेदनशील पालकांना चिंतेत टाकणारी असून गाव- शहरातील तरुण मोठय़ा प्रमाणात 'मोबाईल कॅसिनो'कडे आकर्षित झाले आहेत. परिणामी पालकांनी मोठय़ा प्रेमाने लाडक्याला दिलेला मोबाईल त्याला जुगारी बनवित असल्याचे दुर्दैवी चित्र दिसू लागले आहे.
बाजारात अद्ययावत तंत्रज्ञानाने तयार करण्यात आलेले मोबाईलमध्ये विविध प्रकारच्या सुविधा दिल्या जात आहेत. याचाच एक भाग म्हणून ऑनलाईनद्वारे मोबाईलमधून तीन पानी जुगार चांगलाच रंगलेला असतो. विशेषत: या जुगाराच्या जाळ्यात युवक मोठय़ प्रमाणात सापडत आहे. अँन्डरॉईड मोबाईलमध्ये प्लेस्टोअर अँप्लिकेशनद्वारे तीन पानी जुगार खेळला जात असल्याचे आढळून येत आहे. मोबाईलचा वापर संवादासाठी न होता इतरच कामांसाठी मोठय़ा प्रमाणात होत आहे. लहान मुलांपासून ते वयोवृद्धापर्यंत मोबाईल गरजेची वस्तू बनली असली तरी ज्या उद्देशाने मोबाईलचा वापर होणे आवश्यक आहे तो उद्देश बाजूला सारून या सुविधेचा गैरवापरच मोठय़ा प्रमाणात होताना दिसत आहे. पूर्वी तीन पानी जुगार
खेळण्यासाठी विविध ठिकाणच्या अड्ड्यांवर जावे लागत असे. हा जुगार पत्त्यांच्या सहाय्याने खेळला जात होता. आता तो ऑनलाईन मोबाईलद्वारे तीन पानी जुगार खेळला जात आहे. याद्वारे कोणतीही आर्थिक उलाढाल होत नसली तरी इंटरनेटच्या रिचार्जसाठी वारेमाप खर्च केला जात आहे. टाईमपास म्हणून खेळला जाणारा हा खेळ आता खराखुरा तीनपत्ती जुगार म्हणून खेळण्यास तरुणाई प्रवृत्त होऊ लागली आहे. त्यामुळे या जुगारासाठी पोलिसांच्या सायबर क्राईम सेलला सक्रीय होण्याची गरज यानिमित्ताने निर्माण झाली आहे.
तीन पत्ती जुगारच
जवळपास ९0 टक्के युर्जसच्या हाती दिसणार्‍या अँन्ड्राईड सिस्टीमच्या मोबाईलवर सर्वाधिक खेळला जाणारा खेळ म्हणजे तीन पत्ती हा जुगाराचा खेळ आहे. सकाळी उठल्यापासून मध्यरात्रीपर्यंत अनेक डाव या गेमच्या माध्यमातून खेळले जात असल्याचे वास्तव आहे. फेसबुकसारख्या सोशल साईटवरून मित्रांना ऑनलाईन बोलावून मध्यरात्रीपर्यंत खेळल्या जाणार्‍या या खेळात मुलांपासून युवतीपर्यंत अनेक जण आघाडीवर
असल्याचे चित्र सध्या पाहावयास मिळत आहे. अँन्ड्रॉईड फोनवर अनेक मंडळी या मोफत गेमचा आनंद लुटत आहेत, मात्र धक्कादायक बाब म्हणजे प्रायव्हेट टेबलच्या माध्यमातून आपसात ठरवून तीन पत्ती हा प्रचलित जुगार प्रकार आता मोबाईल इंटरनेटच्या हातोहाती खेळला जात आहे. अशा जुगारावर कायद्याचे नियंत्रण आणणे अशक्यप्राय असल्याने रात्रंदिवस ऑनलाईन तीन पत्ती खेळ खेळणार्‍यांची संख्या झपाट्याने वाढत आहे. विशेष म्हणजे वेळेच्या अपव्ययासोबतच यात पैसे लागत असल्याने महाविद्यालयीन जुगारी बनू लागले आहेत.
पॉकेटमनीचा गैरफायदा
मुलांना खर्चासाठी दिला जाणारा पॉकेटमनी हा चांगल्या कामासाठी खर्च होणे अपेक्षित असताना या तीन पानी जुगारासाठी मुले हजारो रुपये खर्च करीत आहेत. शहरांमध्ये उच्च शिक्षण घेण्यासाठी अनेक मुले बाहेर राहतात. दर महिन्याला त्यांच्या पालकांकडून खर्चमनी येत असतो. मात्र याचा वापर आता गैरमार्गात खर्च केला जातो. मुलांना महागडा मोबाईल खरेदी करून देताना पालक याकडे लक्ष पुरवित नसल्याने रिचार्ज, टॉपअप सोबत मुले पॉकीटमनी जुगारावर उडवित असल्याचे दुर्दैवी चित्र आहे.
गेम्समध्ये होते 'बेटिंग' :
