सत्काराने भारवल्या आशा, अंगणवाडी व आरोग्य सेविका लसीकरणासाठी राबणाऱ्या यंत्रणेच्या पत्रकार संघातर्फे सन्मान

तळोदा : तालुका मराठी पत्रकार संघाच्या वतीने आयोजित सन्मान सोहळ्यात लसीकरणासाठी दिवस-रात्र मेहनत घेणाऱ्या आशा, अंगणवाडी व आरोग्य सेविका यांचा सत्कार करण्यात आला.या सत्काराने आशा,अंगणवाडी व आरोग्य सेविका भारावून गेल्या.ग्राऊंड लेव्हलवर काम करत असताना अनेक अडचणींना तोंड देत वर्षभर लसीकरण मोहिमेत त्यांनी दिलेल्या सक्रिय योगदानाची दखल घेत पत्रकार संघाने सन्मानित केल्याने अनेक आशा,अंगणवाडी व आरोग्य सेविकांच्या डोळे भरून आले.

          तळोदा तालुका मराठी पत्रकार संघ व कै.कलावती फाउंडेशन सोमावल यांच्या संयुक्त विद्यमाने तळोदा तालुक्यात लसीकरणात अग्रस्थानी असणाऱ्या प्रथम पाच गाव व त्या गावात लसीकरण मोहीम यशस्वी करण्यासाठी राबणाऱ्या घटकांचा सन्मान सोहळा तळोदा तालुका मराठी पत्रकार संघाच्या वतीने शहरातील आदिवासी सांस्कृतिक भवनात आज पार पडला कार्यक्रमाच्या अध्यक्षस्थानी नगराध्यक्ष अजय परदेशी होते तर प्रमुख पाहुणे म्हणून राष्ट्रवादी काँग्रेसचे प्रदेश उपाध्यक्ष माजी आमदार उदेसिंग पाडवी,जिल्हा आरोग्य अधिकारी डॉ.महेंद्र चव्हाण,पचायत समिती सभापती यशवंत ठाकरे,सदस्य दाज्या पावरा,विजय राणा, शिवसेना जिल्हा उपाध्यक्ष आनंद भाजपा किसान मोर्चाचे प्रदेश चिटणीस श्याम राजपूत,  नगरसेवक हितेंद्र क्षत्रीय, संदीप परदेशी,रा.का.शहर अध्यक्ष योगेश मराठे,भाजपा किसान मोर्चाचे प्रदेश चिटणीस शाम राजपूत, मोडचे सरपंच जयसिंग माळी, मोहन ठाकरे,नाथ्या पावरा, जेष्ठ पत्रकार दत्तात्रय सूर्यवंशी,तालुका आरोग्य अधिकारी डॉ.विशाल चौधरी,मुस्लिम समाज अध्यक्ष आरिफ नुरा,आदी उपस्थित होते.

        कार्यक्रमात गेल्या वर्षभर कोरोना प्रतिबंधात्मक लसीकरणात तळोदा तालुक्यात अग्रस्थानी असलेल्या पहिल्या पाच गावांना विशेष पुरस्कार देण्यात आले. त्याप्रमाणे या गावात दिवसरात्र लसीकरणासाठी मेहनत घेणाऱ्या आरोग्य सेवक,आरोग्य सेविका, अंगणवाडी सेविका,आशासेविका,आशा गटप्रवर्तक यांचा देखील सन्मान सोहळा पत्रकार संघाच्या वतीने पार पडला.

      यावेळी बोलताना पंचायत समिती सदस्य विजयसिंग राणा यांनी आपल्या मनोगतात सांगितले की,ग्राउंड वर काम करणारे हे कर्मचारी नेहमीच दुर्लक्षित असून पत्रकार संघाने त्याची यथोचित दखल घेत कोरोणा लसीकरणासाठी राबणाऱ्या यंत्रणेच्या सन्मान सोहळा आयोजित केल्याबद्दल पत्रकार संघाचे विशेष कौतुक केले.

        आमदार उदेसिंग पाडवी यांनी देखिल कोरोना प्रतिबंधात्मक लसीकरणासाठी यंत्रणेने केलेले प्रयत्न कौतुकास्पद असून इतर गावांनीही सत्कार झालेल्या गावांकडून प्रेरणा घ्यावी व आपले गाव देखील लसीकरणात अग्रस्थानी हे यासाठी प्रयत्न करावे, असे आवाहन केले.तळोदा तालुका मराठी पत्रकार संघ नेहमी समाजोपयोगी उपक्रम राबवित असून पत्रकार संघाने आदर्श पायंडा निर्माण केला असल्याची भावना त्यांनी आपल्या भाषणात बोलून दाखवली. अध्यक्षीय मनोगतात  नगराध्यक्ष अजय परदेशी म्हणाले की,पत्रकार देखील सर्व यंत्रणेच्या सोबत शहर व तालुक्यात ग्राउंड लेव्हल वर काम करत होते. तत्कालीन उपविभागीय अधिकारी अविशांत पांडा,तत्कालीन तहसीलदार पंकज लोखंडे,तत्कालीन पोलीस निरीक्षक नितीन चव्हाण,तत्कालीन तालुका वैद्यकीय अधिकारी महेंद्र चव्हाण यांचा देखिल नामोल्लेख करत त्यांनी सर्व यंत्रणेचे विशेष कौतुक केले.

         कार्यक्रमाचे प्रस्ताविक पत्रकार संघाचे अध्यक्ष सुनिल सूर्यवंशी यांनी केले. सूत्रसंचालन हंसराज महाले यांनी केले तर पत्रकार संघाचे सचिव उल्हास मगरे यांनी आभार मानले.कार्यक्रमाच्या यशस्वितेसाठी पत्रकार संघाचे उपाध्यक्ष नारायण जाधव,सम्राट महाजन, कोषाध्यक्ष सुधाकर मराठे,भेट भामरे, ईश्वर मराठे, महेंद्र लोहार, नरेश चौधरी, सुशील सूर्यवंशी, किरण पाटील, दीपक मराठे, डॉ.नारायण जाधव, अक्षय जोहरी, महेंद्र सूर्यवंशी यांच्यासह सदस्यांनी परिश्रम घेतले

 

*यांचा झाला सन्मान*

१)  झिरी : डॉ.गौरव सोनवणे,अरुणा वसावे,लतिका  वळवी,विमल सुदाम वळवी ,विजय वळवी,अविनाश भरतसिंग वळवी, सरपंच मीनाबाई वळवी 

२)  धानोरा  : 

डॉ.सागर महाजन,संध्या साळवे,ज्योती साळवे,चंद्रकला पावरा,मोहन ठाकरे , सरपंच जंगलसिंग मोहन ठाकरे  

३)  तळवे :  डॉ.प्रियांका वळवी,आर.के.पाडवी,आक्काबाई नारायण केदार ,पुष्पा सीताराम पाटील, सरपंच बारीकराव

४) आष्टे (मोड): विमल रडत्या पाडवी,अंजना राजू माळी,रजनी अशोक शिंदे,बबिता सत्तेसिंग वळवी,सरपंच जयसिंग माळी.

५) रेवानगर :  डॉ.भरत पावरा,डॉ.महेंद्र ब्राम्हणे,फेंदा पावरा, सविता गावित,अनिता पावरा,संगीता पावरा,दाज्या पावरा 

गरिबांचे डॉक्टर डॉ. वासुदेव मगरे: वैद्यकीय क्षेत्रातील अमूल्य निधान

तळोदा – ग्रामीण भागातील गरिबांचे डॉक्टर म्हणून ओळखले जाणारे डॉ. वासुदेव मगरे यांचे सोमवारी दुपारी ४ वाजता निधन झाले. त्यांच्या जाण्याने तळोदा व पंचक्रोशीतील जनतेने एक देवदूत गमावल्याची भावना व्यक्त केली आहे. त्यांच्या पश्चात पत्नी, मुलगा, सून, दोन मुली, जावई, व नातवंडे असा परिवार आहे.

जीवन प्रवास: साधेपणातून उंच भरारी

प्रतिकूल परिस्थितीतून शिक्षण पूर्ण करत डॉ. मगरे यांनी पुण्याच्या टिळक आयुर्वेदिक महाविद्यालयातून बी.ए.एम.एस. ही पदवी संपादन केली. त्यांनी आपल्या वैद्यकीय कारकिर्दीची सुरुवात खापर गावातून केली आणि त्यानंतर तळोदा येथे रुग्णालय स्थापन करून ४०-४५ वर्षे आपल्या सेवेमुळे पंचक्रोशीत प्रसिद्ध झाले.

रुग्णसेवा: माफक दरात उपचार

डॉ. मगरे यांची वैद्यकीय सेवा ही पैशापेक्षा रुग्णांप्रती असलेल्या निष्ठेमुळे विशेष होती. त्यांनी केवळ १०-२० रुपयांत उपचार केले, तर अनेकवेळा गरजूंना विनामूल्य सेवा दिली. त्यांच्या दवाखान्यात फॅन्सी सुविधा नसल्या, तरी तेथील माणुसकी आणि आपुलकीची भावना प्रत्येक रुग्णाच्या हृदयाला भिडायची.

छोट्या चिठ्ठ्यांवरील प्रिस्क्रिप्शन: मगरे स्टाइल

डॉ. मगरे यांनी कधीच प्रिस्क्रिप्शन लेटरचा वापर केला नाही. छोट्या कागदावर औषधाचे नाव लिहून देण्याची त्यांची पद्धत राज्यातील बड्या रुग्णालयांमध्येही ओळखली जात होती. रुग्णांच्या मते, त्यांच्या निदानाची अचूकता आणि औषधोपचार यामुळे हजारो लोकांना नवजीवन मिळाले.

कोरोना काळातील अमूल्य योगदान

कोरोना महामारीच्या भीषण काळात, जेव्हा इतर डॉक्टरही रुग्ण तपासायला धजावत नव्हते, तेव्हा डॉ. मगरे यांनी बिनधास्तपणे रुग्णांना आपुलकीने सेवा दिली. त्यांची सेवा आणि त्याग आजही रुग्णांच्या आठवणीत ताजे आहेत.

देवदूत हरपल्याची भावना

डॉ. मगरे यांच्या निधनामुळे गावासह पंचक्रोशीत शोककळा पसरली आहे. त्यांनी रुग्णसेवेतून माणसे कमावली आणि "मरावे परी कीर्तीरूपी उरावे" ही उक्ती खरी करून दाखवली. त्यांच्या जाण्याने वैद्यकीय क्षेत्रात मोठी पोकळी निर्माण झाली असून, माफक दरात उपचार घेण्याची परंपरा खंडित होणार आहे.

वैद्यकीय सेवेतील योगदान अजरामर

डॉ. मगरे यांच्या जीवनातील साधेपणा, सेवा वृत्ती, आणि गरिबांप्रती असलेली निष्ठा या गोष्टींमुळे त्यांचे नाव कायम लोकांच्या हृदयात कोरले जाईल. त्यांच्या योगदानाचा गौरव करत, "असा डॉक्टर पुन्हा होणे नाही" असे म्हणत अनेकांनी श्रद्धांजली वाहिली आहे. डॉ. मगरे यांच्या जीवनप्रवासाने, माणुसकी हीच खरी सेवा आहे, हे पुन्हा एकदा सिद्ध केले आहे.

बारगळ व होळकर राजघराण्यातील वंशज्यांच्या ऐतिहासिक भेटीच्या मी ही साक्षीदार !

        मध्य प्रदेशातील नर्मदेच्या किनारी वसलेल्या पुण्यश्लोक अहिल्यादेवी होळकर यांच्या राजधानी महेश्वर येथे भेट देण्याची संधी प्रसंगाने, तळोदा येथील जहागीरदार अमरजीतराजे बारगळ यांच्या सहकार्याने मिळाली.

महेश्वर येथील सुंदर घाट, मंदिरे आणि धर्मशाळांचे स्थापत्य उल्लेखनीय आहे. येथील अनेक ऐतिहासिक वास्तूंवर मुघल, राजपूत आणि मराठा वास्तुशैलीचा प्रभाव दिसून येतो. अहिल्यादेवींच्या पुतळ्यावरील छत्रीला वंदन करण्यासाठी अमरजीतराजे बारगळ यांना महेश्वर आमंत्रित करण्यात आले. विशेष म्हणजे 250 वर्षांनी होळकर राजघराण्याचे 15 वे वंशज, यशवंतराव शिवाजीराव होळकर आणि बारगळांचे 9 वे वंशज, अमरजीतराव बारगळ यांच्यात प्रत्यक्ष संपर्क झाला. अमरजीतराजे बारगळ आणि यशवंतराव होळकर यांच्यात मामा-भाच्याचे नाते आहे. यशवंतराव होळकर, जे परदेशी शिक्षण घेतलेले उच्चभ्रू होते, त्यांचे आमच्याशी वागणं, पाहुणचार, नम्रता आणि त्यांच्या छोट्या छोट्या बाबींची जाणीव ही उल्लेखनीय होती.

राजेशाही थाट असूनही त्यांच्यातील नम्रता आणि शांत संयम पाहून अभिमान वाटला. त्यांनी पारंपरिक राजेशाही पद्धतीने आमचे स्वागत केले आणि विशेषतः स्वयं महेश्वर किल्ल्याचे दर्शन घडवून त्याबाबतची माहिती दिली. रात्रीचे व दुपारचे जेवण सोबत घेतले. अमरजीतरावांकडून ऐतिहासिक माहिती जाणून घेतली आणि नोंद केली. त्यांची वयाच्या 70 व्या वर्षीही प्रचंड स्मरणशक्ती, बारीकसारीक बाबींबद्दलची माहिती, वेळेचे साधर्म्य, आणि इतिहास उलगडताना दिलेले संदर्भ, हे सर्व एक शिक्षण होते. त्यांचा विनोदी स्वभाव आणि आपला ज्ञानाचा उपयोग शब्दांच्या खेळामध्ये करण्याची कला ही अद्वितीय होती.

बाजीराव पेशवे यांच्या समाधीस्थळाच्या जीर्णोद्धारासाठी आणि पर्यटनस्थळ विकसित करण्याच्या उद्देशाने, मध्यप्रदेशचे मुख्यमंत्री शिवराजसिंह चव्हाण, केंद्रीय मंत्री ज्योतिरादित्य सिंधिया, पर्यटन मंत्री उषा ठाकूर यांसह अन्य मंत्र्यांच्या उपस्थितीमध्ये रावळखेडी येथे आयोजित कार्यक्रमात केंद्रीय मंत्री ज्योतिरादित्य सिंधिया यांनी होळकर आणि बारगळ कुटुंबातील वंशज, अमरजीतराजे बारगळ व यशवंतराव होळकर व मस्तानी यांचे वंशजांना व्यासपीठावर बोलावले. हे एक विशेष क्षण होते.

पूर्व नियोजन नसलेल्या प्रवासाला मी सुरुवातीला नकार दिला होता. मात्र कालूभाऊंच्या आग्रहामुळे आणि राजे अमरजीत बारगळ यांच्या भ्रमणध्वनीला नकार देणे कठीण झाल्याने, मी या ऐतिहासिक प्रवासाचा साक्षीदार झालो. याप्रसंगी, धनंजय बारगळ यांच्याशी परिचय झाला, पण सहवासामुळे त्यांच्या व्यक्तिमत्त्वाचे विविध पैलू समजले.

इतिहास घडवणाऱ्या महापुरुषांच्या वंशजांच्या सहवासाने बरेच काही शिकायला मिळाले. इतिहासातील अनेक पैलू उलगडले आणि त्याचा आनंद अनोखा होता....

पुण्यश्लोक अहिल्यादेवी होळकर यांची राजगादीराज्यासोबत शाहीजेवणाची मेजवानी

250 वर्षांनंतर होळकर व बारगळ वंशातील भेटपारंपरिक पद्धतीने स्वागत करताना राजघराण्यातील दाईबाईपुण्यश्लोक अहिल्यादेवी यांचे 15 वे वंशज यशवंतराव होळकर यांच्या सोबत राजगाधीचा दर्शनाचा योगमस्तानी यांचे वंशज

वीर बाजीराव पेशवे यांचे समाधीस्थळ