आणि फसवणूक होता होता टळली!

सर्वच राष्ट्रीयीकृत बँकांनी मॅग्नेटिक ्ट्रिरप असलेले जूने एटीएम कार्ड कालबाह्य ठरवून त्याऐवजी नवीन चिप एटीएम कार्ड ग्राहकांना बंधनकारक केले आहे. याचा फायदा चोरटे घेत असून नागरिकांना बँकेतून बोलत असल्याचे सांगून त्यांच्याकडून जुन्या, नवीन एटीएम कार्ड वरील सोळा डीजीट क्रमांक व पिनकोड मागून ऑनलाईन आर्थिक फसवणूकीचा प्रयत्न करीत आहे. काल एका मुख्याध्यापकाच्या सतर्कतेमुळे भामट्याचा प्रयत्न फसला असून याबाबत तळोदा पोलिसात तक्रार दाखल करण्यात आली आहे. . राष्ट्रीयकृत बँकांना जूने एटीएम कार्ड बदलून नवीन चीप एटीएम कार्ड बँक खातेदारांना बंधनकारक केले आहे. त्यामुळे ३१ डिसेंबर २०१८ पासून जुने एटीएम कार्ड पूर्णपणे बंद झालेले आहे. सध्या नवीन चीप बेस्ड एटीएम कार्डसाठी बँकाकडे मोठ्या प्रमाणात अर्ज आलेले आहेत. जुने एटीएम कार्ड बंद होणार असल्यामुळे हजारो खातेदार नवीन कार्डसाठी बँकांमध्ये गर्दी करत आहेत. नेमकी हीच बाब काही भामट्यांनी हेरली असून बँक खातेदारांना मोबाईल फोन करून बँकेतून अधिकारी बोलत असल्याच्या भूलथापा देऊन तुमचे जुने एटीएम कार्ड आता रद्द होणार आहे. नवीन चिप बेस्ड एटीएम कार्ड घ्यावे लागणार आहे. त्यासाठी तुमच्या १६ अंकी डिजिट नंबर आणि कोड सांगा अशी विचारणा करीत आहेत. बँकांनी नवीन चिप बेस्ड एटीएम कार्ड अनिवार्य केल्यामुळे नागरिकही त्या भामट्याने बोलण्यावर विश्वास देऊन गोपनीय माहिती देऊन टाकतात. यातच फसवणुकीचे प्रकार घडत आहेत. तळोदा येथील शेठ के.डी. हायस्कूलचे मुख्यध्यापक दिलीप गिरनार यांना काल बँकेतून बोलत असल्याचा फोन आला आणि संबंधिताने भूलथापा देऊन माहिती मागितली. मात्र आपली फसवणूक होत असल्याचे गिरणार यांना समजले व त्यांनी त्या भामट्यास पोलिसांत तक्रार दाखल करण्याची धमकी देताच त्याने फोन कट केला. याबाबत गिरणार यांनी तळोदा पोलिसात तक्रारी अर्ज दिला आहे..