अवजड वाहनांमुळे तळोदा शहरात अपघाताचा धोका वाढला

सूरळीत वाहतुकीसाठी बायपास मार्ग अवलंबावा ; पोलिसांनी वाहतूक शिस्तीसाठी पावले उचलणे गरजेचे
तळोदा शहराची बेशिस्त वाहतूक व्यवस्था चर्चेत आली आहे. याबाबत दै.पुण्यनगरीच्या माध्यमातून वेळोवेळी परिस्थिती सहचित्र मांडण्यात येत आहे. यानंतर पोलिस प्रशासनाकडून वाहतूक शिस्तीसाठी थातूरमातूर कारवाई करण्यात आली.त्या कारवाईतही दुजाभाव केला जात असल्याचा आरोप वाहनधारक करीत आहेत. वहतूकीच्या उपाययोजनेबाबत पोलिस प्रशासन अजूनही फारसे गंभीर दिसून येत नाही. आजही शहरात फॅन्सी नंबर प्लेट असलेले वाहने सुसाट धावत आहेत. बेशिस्त वाहनधारक वाहने भर रस्त्यात उभी करत आहेत. ट्रिपल सीट्स वाहने हाकण्यास जणू पोलिसांनीच परवाना दिला आहे. अल्पवयीन मुले बिनधास्त वाहतुकीचे नियम पायदळी तुडवत वाहने हाकत आहेत. सध्या ऊस तोडीचा हंगाम सुरू आहे. ऊस वाहतूक करणारी ट्रॅक्टर ट्रॉली व बैलगाड्यांची वर्दळ शहरात वाढली आहे. ऊस वाहतूक करणारी वाहने शहरातूनच जात असल्याने वाहतुकीचा बोजवारा उडत असून अपघाताची शक्यता वाढली आहे. बऱ्याचदा रस्त्यावरील गतिरोधक ओलांडताना उसाने भरलेली वाहने अक्षरश: उभी राहतात. जीवघेणी कसरत करत वाहने शहरातून नेली जात आहेत. परिणामी भरलेले वाहने पडण्याची शक्यता निर्माण होत असून ट्रॉलीतून रस्त्यावर ऊसाच्या मुळ्या पडणे, रस्त्यावर पंक्चर होणे यासारखे प्रकार घडत आहेत. ट्रॅक्टरला एकच हेडलाईट असल्याने अपघाताची शक्यता अधिक वाढते. अनेक ट्रॅक्टरला नंबर नसणे, नवीन ट्राली आरटीओकडे नोंदणी न करता वाहतुकीसाठी खुलेआमपणे वापरली जात आहेत. काही वाहनांना तर परवाना नसतो. या नियमबाह्य बाबींकडे पोलिस प्रशासनासह आरटीओंचे देखील दर्लक्ष आहे. यामुळे कसलीच तमा न बाळगता वाहने वेगात चालवणे, रस्त्यावर कुठेही कधीही, कशीही उभे करणे असे प्रकार होताना दिसून येत आहेत. त्यामुळे इतर वाहनधारक, प्रवाशांना मोठा मनस्ताप सहन करण्याची वेळ आली आहे. वाहतुकीला शिस्त लागण्याबरोबरच चालकांनी सतर्क राहणे गरजेचे बनले आहे. वाहनाला रिफ्लेक्टर लावले आहेत का, वेग मर्यादेचे उल्लंघन करीत मोठ्या प्रमाणात कर्कश आवाज वाढवत आहे का ? यासारख्या बाबींचीही तपासणी करणे गरजेचे झाले आहे. यामुळे वाहतूक शिस्त आजच्या घडीला वाहतूक पोलिसांपुढे मोठे आव्हान निर्माण झाले असून ठोण पावले उचलणे गरजेचे झाले आहे..