बोगस डॉक्टर शोध मोहीम

डॉक्टराची पथकासोबत हुज्जत आणि मंत्र्यांना दुरध्वनी!

धमकी दिल्याने पथक फिरले माघारीबोरद : बोगस डॉक्टर शोध मोहीमेंतर्गत आलेल्या पथकासोबत संबधित डॉक्टरने घातलेली हुज्जत व एका मंत्र्यांशी दुरध्वनीवरुन संवाद साधल्याने पथकाला कारवाई न करता खाली हात परतावे लागल्याची घटना बोरद गावात एकच चर्चेचा विषय ठरली आहे. या डॉक्टर महाशयांनी चक्क पथकालाच त्यांच्या कुंडल्या बाहेर काढण्याचे दिलेले आव्हानाबाबत प्रश्न उपस्थित करण्यात आला आहे. या डॉक्टर विरोधात अहवाल तयार करुन वरिष्ठांना सादर करण्याची माहिती देणारे पथकाने गुन्हा दाखल करण्याची हिंमत का दाखविली नाही याबाबत उलटसुलट चर्चा रंगली आहे.
जिल्ह्यात बोगस डॉक्टर शोध मोहीम राबविण्यात येत आहे. या माहीमेंतर्गत ठिकठिकाणाहून बोगस डॉक्टर आढळून येत असल्याने खळबळ उडाली आहे. तळोदा शहरात देखील बोगस डॉक्टरवर कारवाई करण्यात आली असून यामुळे अनेकांनी आपला गाशा गुंडाळत पलायन केले आहे. जिल्हयाभरात चार-पाच बोगस डॉक्टरांवर भरारी पथकाने कारवाई केली आहे. तळोदा तालुक्यातील पथकाने ग्रामीण भागात आपला मोर्चा वळविला आहे. काल बुधवारी तालुक्यातील बोरद गावात पथकाने भेट देवून तपासणी मोहीम राबविली. गावातील एका खाजगी दवाखान्यास पथकाने भेट देऊन संबंधित डॉक्टराकडून वैद्यकीय पदवी प्रमाणपत्राची मागणी केली. सदर डॉक्टराकडे बीईएमएसची एलक्ट्रोपॅथीची असलेली पदवी प्रमाणपत्र पथकातील अधिकार्‍यांना दाखविले. पथकाने दवाखान्याची तपासणी केली असता डॉक्टर अलोपॅथिक व्यवसाय करीत असल्याचे पथकाच्या

निदर्शनास आले. दवाखान्यात प्रतिज्योतीची सलाईन, इंजेक्शन आदींसह अलोपॅथीची औषधी आढळून आली. पथकाने अँलोपॅथीची पदवी नसतांना औषधी बाळगणे व रुग्णांवर उपचार करणे कायदेशीर गुन्हा असल्याचे सांगत याबाबत विचारणा संबधित डॉक्टरला तंबी दिली. मात्र, संबंधित डॉक्टर हा आलेल्या पथकावर चांगलाच भारी पडला. रुग्णांची सेवा न करता शासनाच्या गलेलठ्ठ पगार घेऊन लाखोंच्या बंगल्यात राहणार्‍या डॉक्टरांनी फक्त माझ्यावर गुन्हे दाखल करुन दाखवावेत, संबंधीताच्या सर्व कुंडल्या मी उघडून त्यांना रस्त्यावर आणल्याशिवाय राहणार नाही! असे गावकर्‍यांसमोर खुले आव्हान दिले. संबंधित डॉक्टरने पथकातील अधिकार्‍यांशी चांगलीच हुज्जत घालत अनेकवेळा बोरद रुग्णालयात रात्री-बेरात्री गरोदर मातेचे बाळंतपण करण्यास मला या पथकातीलच एका अधिकार्‍याने बोलविले आहे, त्यावेळी माझी पदवी नाही पाहीली का? असा प्रती सवाल आलेल्या पथकास संबंधीत डॉक्टराने विचारल्याने पथकातील अधिकारी निशब्ध झाले. बोरद गावातील रुगणालाय निष्क्रिय असल्याचा आरोप या डॉक्टरने यावेळी केला. मी येथे राहून रुग्णांना चांगल्या प्रकारे सेवा देण्याचे काम करीत असून अनेकांचे प्राण वाचविले आहेत, असे सांगितले. यामुळे पथकातील अधिकारी व संबधित डॉक्टरामधील वाद चांगलाच वाढला. दरम्यान, संबंधीत डॉक्टरने संघटनेच्या अध्यक्षांशी संपर्क साधला असता त्यावर जिल्हाध्यक्षांनी पथकास योग्य ते सहकार्य करण्याचे आदेश संबधित डॉक्टरला दिल्याचे समजते. मात्र, मला संघटनेची गरज नाही मी सक्षम असल्याचे सांगत तात्काळ एका केंद्रीय मंत्र्यांना फोन करुन संबंधीत पथक हे मला त्रास देत असल्याची माहिती दिल्याचे प्रत्यक्षदश्रींनी सांगितले. संबंधित डॉक्टराने दिलेली धमकी व मंत्र्यांशी केलेल्या वार्तालापामुळे पथकाने काढता पाय घेतल्याचे समजते. संबंधीत बोगस डॉक्टराबाबत अहवाल तयार करुन तो वरीष्ठांकडे सादर करण्यात येणार असल्याचे पथकातील अधिकार्‍यांनी सांगितले. मात्र या घटनेनंतर मंत्र्यांशी संपर्क असणारा डॉक्टर कोण? त्याला संबंधीत पथकाच्या कुठल्या कुंडल्या माहित असाव्यात? याबाबत बोरद गावासह तालुक्यात चर्चा सुरु आहे. वरिष्ठांनी नियुक्त केलेल्या पथकातील अधिकारी व संबंधीत डॉक्टरांची चौकशी करावी, अशी मागणी गावकर्‍यांनी केली आहे.