नंदुरबार जिल्ह्यातील अतिदुर्गम भागात गरोदर माता मृत्यू व बालमृत्यूचे प्रमाण अधिक आहे. यावर मात करण्यासाठी शासन व प्रशासन पराकोटीचे प्रयत्न करीत आहेत. त्यातच आता प्रशासनाच्या प्रयत्नांना जोड मिळाली आहे ती एम खुशहाली ॲपची! शाश्वत विकासाचे ध्येय गाठण्यासाठी अरमान व टाटा ट्रस्ट यांचामार्फत 'एम खुशहाली ॲप' तयार करण्यात आले असून या माध्यमातून ५३४८ गरोदर माता व १४९१ बाळाची नोंदणी करण्यात आली आहे. यापैकी २३३८ माता आणि २३२ बाळांना या माध्यमातून सेवा पुरविण्यात आली आहे. एक सक्षम पाऊल माता व बाळ मृत्यू कमी करण्यासाठी 'अरमान'तर्फे उचलण्यात आले आहे. दुर्गम व अतिदुर्गम भागातील गरोदर मातांना वेळेवर उपचार मिळण्यास मदत होत आहे.. नंदुरबार जिल्ह्यात माता व बाळ मृत्यू कमी व्हावे याकरिता अरमान या संस्थेने एम खुशहाली ॲप तयार केले असून या माध्यमातून बालमृत्यू व गरोदर माता मृत्यूवर नियंत्रण ठेवण्याचा प्रयत्न केला जात आहे. सदर प्रकल्पास टाटा ट्रस्टतर्फे वित्तीय सहाय्यता केली जात असून जिल्हा आरोग्य विभागाच्या संयुक्त विद्यमाने प्रकल्पाची अंमलबजावणी धडगाव व तळोदा तालुक्यात प्रायोगिक तत्वावर केली जात आहे. यात तळोदा तालुक्यात प्रतापपूर, सोमावल, बोरद, वाल्हेरी प्राथमिक आरोग्य केंद्र तर धडगाव तालुक्यातील बिलगाव व चुलवड या दोन प्राथमिक आरोग्य केंद्रांसह एकूण १५१ गावांचा समावेश करण्यात आला आहे.
अरमान व टाटा संस्थेच्या विद्यमाने राबविला जात असलेला सदर उपक्रम हा दुर्गम व अतिदुर्गम भागात महत्वाचा ठरत आहे. या माध्यमातून आरोग्य विभागाला अतिदक्षतेच्या गर्भवती महिला तात्काळ कळण्यास मदत होत आहे. ॲनिमेशनच्या माध्यमातून केलेले समुपदेशन हे महिलांना समजण्यास सोपे आहे. सदर उपक्रमामुळे माता व बाळ मृत्यू कमी करण्यास हातभार लागत आहे. . -महेंद्र चव्हाण . तालुका वैद्यकीय अधिकारी, तळोदा.
